శ్రీ మధ్వాచార్య కృత ద్వాదశ స్తోత్ర - ద్వితీయస్తోత్రం - విష్ణు స్తోత్రాలు

అథ ద్వితీయస్తోత్రం

స్వజనోదధిసంవృద్ధి పూర్ణచంద్రో గుణార్ణవః । (సుజనోదధిసంవృద్ధి)
అమందానంద సాంద్రో నః సదావ్యాదిందిరాపతిః ॥ 1॥ (ప్రీయాతామిందిరాపతిః)
రమాచకోరీవిధవే దుష్టదర్పోదవహ్నయే । (దుష్టసర్పోదవహ్నయే)
సత్పాంథజనగేహాయ నమో నారాయణాయ తే ॥ 2॥

చిదచిద్భేదం అఖిలం విధాయాధాయ భుంజతే ।
అవ్యాకృతగుహస్థాయ రమాప్రణయినే నమః ॥ 3॥

అమందగుణసారోఽపి మందహాసేన వీక్షితః ।
నిత్యమిందిరయాఽనందసాంద్రో యో నౌమి తం హరిమ్ ॥ 4॥

వశీ వశో (వశే) న కస్యాపి యోఽజితో విజితాఖిలః ।
సర్వకర్తా న క్రియతే తం నమామి రమాపతిమ్ ॥ 5॥

అగుణాయగుణోద్రేక స్వరూపాయాదికారిణే ।
విదారితారిసంఘాయ వాసుదేవాయ తే నమః ॥ 6॥

ఆదిదేవాయ దేవానాం పతయే సాదితారయే ।
అనాద్యజ్ఞానపారాయ నమః పారావరాశ్రయ ॥ 7॥ (నమో వరవరాయ తే)
అజాయ జనయిత్రేఽస్య విజితాఖిలదానవ ।
అజాది పూజ్యపాదాయ నమస్తే గరుడధ్వజ ॥ 8॥

ఇందిరామందసాంద్రాగ్ర్య కటాక్షప్రేక్షితాత్మనే ।
అస్మదిష్టైక కార్యాయ పూర్ణాయ హరయే నమః ॥ 9॥

ఇతి శ్రీమదానందతీర్థభగవత్పాదాచార్య విరచితం
ద్వాదశస్తోత్రేషు ద్వితీయస్తోత్రం సంపూర్ణం